Ерусалим, 18 ноември 2014 (МИА) - Четворица Израелци загинаа утрово при напад врз синагога во Ерусалим извршен од страна на двајца Палестинци, кои потоа беа убиени од полицијата, изјави портпаролката на полицијата Луба Самри.
Според неа, двајцата терористи влегле во синагогата во квартот Хар Ноф. Тие ги нападнале верниците со секира и пиштол, при што четворица се убиени. При интервенција на полицијата биле застрелани и двајцата напаѓачи. Во инцидентот повредени се двајца полицајци и четворица верници.
Хар Ноф е кварт во Западен Ерусалим, населен со ултраортодоксни Евреи.
Нападот се случува по вчерашниот повик на радикални палестински групи, меѓу кои и Хамас, за одмазда, откако пред два дена еден палестински возач на автобус бил пронајден обесен во возилото на градски паркинг.
Полицијата соопшти дека 32-годишниот Јусеф ал Рамуни извршил самоубиство, додека палестински експерт, кој учествувал во аутопсијата, изјави дека причина за смртта е задушување од бесењето, но изрази сомнеж дека тој тоа го направил сам. Семејството на возачот тврди дека бил убиен од радикални Евреи.