Видодо нареди истрага за инцидентот меѓу армијата и полицијата во Батам

Џакарта, 20 ноември 2014 (МИА) - Претседателот на Индонезија Јоко Видодо денеска нареди врвните луѓе на армијата и полицијата директно да ја раководат истрагата по повод синоќешната тепачка меѓу припадници на армијата и специјалната полиција во местото Батам на островот Риау, во близина на Сингапур.

Во тепачката која траела од пет часот попладне, па речиси до полноќ, загинал еден војник, а најмалку двајца се потешко повредени.

Во првите изјави за медиумите, командантите на армијата и полицијата не ги соопштија причините за големата тепачка. Според нив, до сега не постоеле знаци за нетрпеливост меѓу војниците и припадниците на специјалната полиција.

Островот Риау и градот Батам, во кој се случил инцидентот, се на крајниот север на индонезискиот архипелаг и се еден вид слободна трговска и индустриска зона со многу повластици за странските инвеститори.