Во Намибија се избира парламент и претседател
Виндхук, 28 ноември 2014 (МИА) - Избирачите во Намибија почнаа утрово да гласаат за претседател и Парламент. Се очекува владејачката партија СУАПО да остане на власт, а нејзиниот лидер, премиерот Хаге Гејнгоб, да стане претседател.
Тоа ќе биде првото гласање во Африка остварено по електронски пат - преку екрани на допир.
Седумдесет и тригодишниот Гејнгоб се очекува да стане наследник на сегашниот шеф на државата Хифекепуние Похамба (79), кој не може да се кандидира повторно по два претседателски мандати.
Околу 1,2 милиони Намибијци со право на глас може да се јават денеска на 4.000 избирачки места во целата јужноафриканска земја, колонизирана од Германија, а во 1915 година, преземена и управувана од Јужна Африка.
СУАПО - водечката партија во борбата против колонијализмот и апартхејдот, досега ги доби сите избори во земјата, која доби независност во 1990 година.
|