Венецуела не дозволи поранешните претседатели на Чиле и Колумбија да посетат затворен опозиционерКаракас, 27 јануари 2015 (МИА) - Владата на Венецуела не им дозволи на поранешните претседатели на Чиле и на Колумбија да го посетат во затвор опозицискиот лидер Леополдо Лопез.
Себастијано Пинеро и Андреас Пастрана изјавија дека дошле во Каракас за да и дадат подршка на венецуелската опозиција.
Поранешните лидери на Чиле и на Колумбија побараа ослободување на Лопез, кој се наоѓа во затвор од почетокот на февруари минатата година.
Веецуелскиот претседател Николас Мадуро, меѓутоа, ги обвини двајцата јужноамерикански политичари дека „се приклучиле на заговорот за правење пуч“ за неговото сменување од функцијата.
Пинеро и Пастрана допатуваа во Венецуела за да учествуваат во форумот за демократија, што во Каракас го организира венецуелската опозиција.
Лопез е затворен во еден воен затвор во околината на Каракас. Тој беше уапсен за време на еден митинг на опозоцијата, по што избувнаа демонстрации кои се претворија во нереди. Во следните неколку месеци, до крајот на мај минатата година, во главнот град, како и во неколку други градови во внатрешноста, избувнаа улични нереди во кои беа убиени повеќе од 40 лица.
Владата го обвинува Лопез дека „потикнувал насилство“ за да се собори сегашната власт во земјата.
Во текот на изминатиот викенд прв пат по неколку месеци во Каракас одново избувнаа протести на кои демонстрантите удираа во празните лонци, симболично покажувајќи ја тешката криза во снабдувањето со најосновните потрошувачки производи во земјата.
Венецуела е богата со нафта, но популистичка политика што ја води претседателот Мадуро и социјалистичката економија што и ја наметна на земјата, предизвикаа криза во снабдувањето. Ситуацијата последните месеци е влошена и со падот на цената на нафтата.
|