Сан Хосе, 29 јануари 2015 (МИА) - Кубанскиот претседател Раул Кастро побара САД да го укинат повеќедецениското ембарго кон Куба, со цел да се нормализираат меѓусебните односи, признавајќи дека патот до постигнување на оваа цел ќе биде долг и тежок.
- Обновувањето на дипломатските односи е започнување на процес за нормализирање на меѓусебните односи, но тоа нема да се постигне додека има ембарго. Не е решен основниот проблем. Економското, трговското и финансиското ембарго, кое причинува огромни човечки и економски штети, претставува кршење на меѓународното право и тоа треба да се укине, истакна Кастро за време на синоќешната средба на Заедницата на латиноамериканските и карибските држави во Коста Рика.
Тој, исто така, бара од САД да ја обесштетат неговата земја за проблемите кои и се причинети поради ембаргото и да и ја вратат на Куба базата Гвантанамо.
Кастро нагласи дека нема да прифати каков било притисок врз внатрешните работи на Куба за време на преговорите со САД.