Вашингтон, 31 јануари 2015 (МИА) - Експерт на Исламската држава за хемиско оружје убиен е во воздушен напад на коалициските сили минатиот викенд, во близина на ирачкиот град Мосул, соопшти денеска Централната команда.
Во воздушниот напад изведен минатата сабота загина Абу Малик, чија обука обезбеди на терористичката група стручност во врска со хемиското оружје, се наведува во соопштението.
Малик работел во погонот за производство на хемиско оружје во време на режимот на убиениот ирачки лидер Садам Хусеин и подоцна, во 2005 година, се поврзал со Ал Каеда во Ирак, пред да се придружи на џихадистите на ИД, наведува американската Централна команда.
„Се очекува дека неговата смрт привремено ќе ја наруши терористичката мрежа и ќе ја намали способноста на ИД за потенцијално производство и користење на хемиско оружје против невини луѓе, се наведува во соопштението.
Засега нема знаци дека ИД поседува голем арсенал на хемиско оружје, но има индиции дека поседува гасен хлор, кој се користи за хемиски тероризам, иако не е така смртоносен како нервните отрови.