Импичмент за 38 поранешни сенатори во ТајландБангкок, 27 февруари 2015 (МИА) - Група од 38 поранешни сенатори во Тајланд се соочува со процес на импичмент, што значи дека ако бидат прогласени за виновни, не ќе можат активно да се занимаваат со полтика и ќе го загубат правото да се кандидираат на новите избори.
Сенаторите се обвинети за усвојување на амандмани на Уставот во 2012 година, со што, според сегашните воени власти, овозможиле незаконски привелегии за себе и за тогашната Влада.
Новото Националното законодавно собрание на Тајланд, составено од членови што ги именуваше воената хунта по државниот удар од мај минатата година, во процесот на импичмент ќе гласаат на 13 март. Ден пред тоа ќе се одржи и сослушување на обвинетите.
Обвинетите сенатори ќе се обидат да докажат дека процесот за нивниот импичмент е подготвен врз основа на определби на поранешниот тајландски Устав, кој воената хунта го прогласи за неважечки.
Прва жртва на процесите на импичмент во Тајланд беше последната премиерка Јинглук Шинаватра. Таа доби забрана за занимавање со политика во следните пет години, но се соочува и со судење за криминал, поврзан со контроверзното спроведување на владината политика за субвенционирање на производителите и трговците на ориз.
Според сегашните власти, државата поради погрешни одлуки на Шинаватра и нејзиниот кабинет, претрпела штета од над 20 милијарди долари.
|