ЕУ стравува дека ИД ќе го уништи културното наследство во ПалмираБрисел, 21 мај 2015 (МИА) - Шефот на европската дипломатија Федерика Могерини предупреди денеска на можноста од воени злосторства во Палмира и уништување на културните споменици, откако тој древен град го зазедоа борци на Исламска држава.
Илјадници луѓе се изложени на ризик од насилство, додека на културните споменици им се заканува уништување, предупреди Могерини во соопштение, наведувајќи дека „Палмира е симбол на сириското културно наследство и крстосница на цивилизациите низ историјата“.
Според извештаите, стотици луѓе загинаа кога џихадисти денеска ја окупираа Палмира, која е под заштита на УНЕСКО, како светско културно наследство.
Масовните убиства и намерното уништување на археолошкото и културното наследство во Сирија и Ирак, кое го спроведува ИД, претставуваат воено злосторство кон Римскиот статут и Меѓународниот кривичен суд, потсети Могерини.
Падот на древниот град доаѓа во текот на кампањата, која ИД ја нарекува „културно чистење“, па исламистите уништуваат реликвии ширум древната Месопотамија.
Могерини, во текот на актуелната турнеја на Блискиот исток, наведе дека ЕУ презела соодветни чекори за спречување на трговијата со културни добра, додавајќи дека трговијата директно придонесува за финансирање на ИД.
|