IDIVIDI

среда, 21.05.2008

IDIVIDI Мени

Забава / Showbiz

Тамара, Врчак и Адријан се претставија во Белград

Музичката евровизиска делегација на Македонија ги претстави своите учесници на изборот за Евровизија во „Сава“ центарот во Белград.

Македонија во второто полуфинале ќе ја претставуваат Тамара Тодевска, Раде Врчаковски - Врчак и Адријан Гаџа со песната „Let me love you“, за која музиката и текстот ги изработи Врчак.

Иако македонската музичка евровизиска тројка својата песна ја испеа на шест јазици (македонски, англиски, српски, турски, албански и руски), на Евровизија тие ќе ја отпеат англиската верзија на песната бидејќи сакаат сите да разберат за што пеат.

Нивната песна во хип-хоп и р'н'б верзија претставува резултат на искуството на тројцата изведувачи кои се занимаваат со различни музички жанрови, а за оваа можност тие ја споија својата енергија и имаат намера да им ја пренесат на луѓето во Белградската арена.

Шефот на македонската делегација Миланка Рашиќ најави дека денес во „Еурокафе“ во 22 часот ќе биде организирана забава на која сите присутни ќе имаат можност да уживаат во музиката на Тамара, Врчак и Адријан, како и во македонската храна и вино.

Дел од забавата ќе биде посветен на најголемата македонска музичка ѕвезда, пејачот Тоше Проески, кој минатата година во сообраќајна несреќа го загуби животот. Ќе биде прикажан и документарен филм за неговиот интернационален успех.

Тамара учествуваше на многу фестивали, а во 2005 година се појави нејзиниот албум „Сино“ кој беше прогласен за албум на годината во Македонија. Таа учествуваше и на Евровизија во 2004 година како придружен вокал на Тоше Проески.

Раде Врчаковски - Врчак ги завршува студиите по медицина и е познат композитор, текстописец и изведувач, а неговиот последен албум излезе во 2007 година и беше еден од најпродаваните во земјата.

Врчак беше и амбасадор на добрата волја на УНИЦЕФ и добитник на наградата за хуманитарна работа „Мајка Тереза“. Тој е и автор на песната „Нинанајна“ со која Елена Ристеска се претстави на Евровизија во 2006 година.

Адријан Гаџа, познат по своите атрактивни сценски настапи, го освои првото место на „Видеофест“ и „Охрид фест“ и е прогласен за најдобар изведувач на „Топфест“, а во дует со Есма Реџепова го освои второто место на македонскиот избор за Евровизија во 2006 година. Гаџа има објавено три албуми на албански и еден на македонски јазик.