Со голем концерт на плоштадот „Македонија“ на 17 мај, се завршува и неколу месечната фаза од ребрендирањето на АД „Македонски Телекомуникации“ во Македонски Телеком АД Скопје и доаѓањето на T-Home во Македонија. Како потврда на мотото „T-Home носи возбуда во секое семејство“ за сите граѓани T-Home организира голем бесплатен концерт кој ќе започне со балканската мега ѕвезда Здравко Чолиќ. Концертот на Чолиќ ќе започне во 20.30 часот и ќе трае 90 минути. Организиран е на највисоко техничко ниво со најголемата сцена која до сега воопшто била изградена на плоштадот и поддржан со музичка опрема донесена во Македонија специјално за овој повод.

Мега ѕвездата Здравко Чолиќ е избран за овој повод по претходно спроведено истражување меѓу корисниците за тоа кого од музичките ѕвезди би сакале да го видат на концерт во Скопје. Според планот, Чолиќ пред македонската публика ќе ги изведе неговите најголеми интернационални хитови од неговата кариера, а останатиот дел од песните ќе бидат оние од неговиот последен студиски албум „Завичај“. Чолиќ во Македонија доаѓа по неговата голема турнеја низ Северна Америка. Неговиот последен концерт во нашата земја беше пред 4 години.

Во Македонија тој доаѓа со тим од професионалци кој брои околу 40 луѓе кои, заедно со македонскиот тим, ќе обезбедат комплетно реализирање на претходно дефинираниот план за неговиот настап. Заедно со Чолиќ доаѓа и оркестар од 11 гудачи, 7 музичари, 4 пратечки вокали, 6 балерини, 8 новинари и двајца тур менаџери.

Сцената на која ќе настапува е најголемата сцена која до сега била изградена за ваков повод на плоштадот „Македонија“ и е долга 22 метри. За комплетно уживање на посетителите обезбедена е и најдобра музичка техника за озвучување која е донесена од студио „Берар“ од Нови Сад, а дополнително е поставена и техника донесена од Англија. За ѕвездите се обезбедени и посебни backstage простории.

Концертот на Здравко ќе започне во 20.30 часот, по што продолжува и 90 минутен концерт на британската музичка атракција Sugababes, од 22.30 часот.

Концертот е бесплатен за сите посетители.

ЗДРАВКО ЧОЛИЌ / БИОГРАФИЈА

Очигледно е дека овој човек уште кога бил многу млад успевал во се она што го замислил – и кога бил фудбалер, и кога бил спринтер, и кога имал свој бенд, а очигледно дека му успева и тоа да биде најпопулрниот машки вокал на овие простори во последниве 30 години. Здравко Чолиќ на публиката од екс-југословенските простори и ги остави во наследство некои од најубавите поп песни, а истото продолжува да го прави и со неговите последни музички материјали. Неговите албуми се најчесто прогласувани за албум на годината, како „Окано“ на пример, а неговиот последен „Завичај“ својот прв тираж од 300 илјади примероци успеа да го продаде за помалку од еден месец.

Роден е како син на полицаецот Владимир и домаќинката Стана, двајцата од Требиње, преселени во Сараево, Босна и Херцеговина. Малиот Здравко имал намера да биде спортист. Бил активен фудбалер во ФК „Железничар“, пред да се префрли на брзо трчање каде што постигнувал одлични резултати. Ако веќе инсистирате, можел да истрча 100 метри со препреки за 11,3 секунди.

Неговите први интереси за музиката се поврзани со неговото свирење гитара со пријателите по паркови. Сепак, првиот позначаен настап му е во 1968 година кога поминувал неколку дена за време на празникот „29-ти ноември“ во Црна Гора, кога еден пријател го натерал да се пријави на аматерски натпревар во пеење. Здравко завршил втор со изведбата на Lady Madonna од The Beatles. Oхрабрен од ваквото искуство, го создава својот прв бенд „Mladi I lijepi“. Ваквата дружба не трае долго, затоа што брзо по матурирањето во 1969 година, тој се префрлува во многу посериозниот „Амбасадори“ во кој останува во следните 2 години. Заради обврски со армијата, дел од членовите се спречени да настапуваат често, па затоа Чолиќ заедно со уште еден член ги создаваат „Нови Амбасадори“ во 1970 година.