Блокирани улици, врвулица од луѓе, насмеани фаци, зголемен адреналин. Најмасовна излезеност на македонските граѓани во центарот на метрополата. Не, не  станува збор за предизборен митинг, станува збор за најдобрата забава во последните 10 години, а можеби и повеќе.

T-Home, докажа дека дефинитивно го знае вкусот на народот. Знае како да ги урне сите можни бариери, и да ги сплоти сите, без разлика на возраста и националноста. Да му го понуди на народот тоа што му треба и за момент да направи Партија на добрата забава.

Четиричасовната забава започна со поп иконата на балканските простори Здравко Чолиќ, кој со својот оркестар и танчерки уште во првите минути успеа да ја пренесе својата позитивна енергија и да го крене расположението на публиката до максимум. Миксот од стари и нови песни, на начин на кој е само својствен Чолиќ, го стави народот во делириум, кој во еден глас, како петти пратечки вокал ја дополнуваше музиката на вечното момче.

Огромната сцена, доброто озвучување и одличното светло придонесоа за френетични аплаузи и врисоци после секоја од песните од двочасовното шоу на Чолиќ, кој уште еднаш покажа и докажа дека го знае патот до добрата забава.

Добро загреаната неколкуилјадна публика, брзо го направи менталниот switch и одлично ги прифати трите британски убавици Sugababes. Киша, Хајди и Амели со својот секси изглед и одлични вокални способности го притиснаа копчето и дополнително ги разбуркаа страстите на публиката.

Исполнувајќи ги своите мега хитови, од Ugly, Push the Button, преку Round Round, "Hole In The Head", искомбинирани со песните од последниот албум, девојките како да ја хипнотизираа публиката, која и еден час по завршувањето на забавата се уште беше на плоштадот, очекувајќи уште добра забава.

Партијата на добрата забава, на крај сепак се растури, но веројатно, во некоја нова прилика, во повеќе или помалку изменет состав повторно ќе се состане и ќе покаже дека знае да се журка.

ГАЛЕРИЈА

(Д.Т)

фото: Д. Христов