|
 |
|
Забава / Showbiz
|
|
Промовиран видеозаписот „Сам легнувам“ на „Синтезис“
Скопје, 14 октомври (МИА) - Познатата македонска етногрупа „Синтезис“ денеска го промовираше видеозаписот за темата „Сам легнувам“, што се наоѓа на нивниот најнов албум „Идентитет“.
„Сам легнувам“ е македонска песна стара околу 250 години, која потекнува од источниот крај на Македонија. Станува збор за балада со љубовна тематика и со побрз ритам.
Режисерот на спотот Никола Кумев на денешната прес-конференција рече дека соработката со „Синтезис“ почнала со стапувањето на нивната музика на краткометражниот филм „10“.
- Спотот е со модерен израз, снимен е летото во Охрид и во него има снимки од филмот „Вода“. Се надевам дека соработката со групата ќе продолжи, истакна Кумев. Спотот е во продукција на „Кумев брадерс“.
Радослав Шурбевски, член на групата посочи дека „Синтезис“ е добитник на меѓународна награда на европско ниво од Европската организација на туристички новинари за придонес за развој на туризмот во 2008 година.
Церемонијата на доделувањето на наградите на сите номинирани брендови од Европа ќе се одржи на 16 и 17 октомври во Сплит, каде што „Синтезис“ освен што ќе ја прими оваа престижна награда, ќе го одбележи отворањето и затворањето на оваа манифестација со свој настап.
Предлогот на оваа организација, како што беше речено на прес-конференцијата, се темели на големите заслуги во негувањето, обработката и оргиналната презентација на македонската етно-музика во светот, а целокупниот труд на „Синтезис“ е исклучително значаен за промоција на македонската култура и за придонесот за развојот на туризмот во Македонија. Настанот ќе биде снимен од Евровизија, што, според членовите на групата, е можност и за туристичка промоција на Македонија.
Марјан Ивановски, член на „Синтезис“ се осврна на следните планови на групата и на насловниот омот на лиценцното издание на албумот „Identity“ во Шпанија. Песните со текст, истакна тој, се преведени на архаичен англиски и на шпански јазик.
- Сите песни се преведени и ова е добра презентација на македонскиот јазик, рече Ивановски.
Тој најави дека по враќањето од Сплит групата ќе замине за Шпанија каде што ќе настапи на Фестивалот Еволуциона музика 2008 што ќе се одржи во градот Бургос. „Синтезис“ ќе сними два концерти, ќе го презентира најновиот албум, а на 2 ноември ќе настапи со симфонискиот оркестар на Бургос.
Според најавите, во декември групата ќе настапи во Цанкарев дом во Словенија.
|
|
|
|
|
 |
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|