Кравата Чили е нежниот џин. Висока е 1 метар и 98 сантиметри и живее во прифатилиштето за животни Ferne Animal во Велика Британија. Вработените во прифатилиштето веќе го контактирале одборот на Гинисовата книга на рекорди, кој во моментов утврдува дали навистина оваа е најголемата крава во Британија.

Чили е потешка од еден тон и е голема колку мал слон. Во споредба со неа останатите крави од нејзиното стадо се високи по 1,5 метар.

И покрај грандиозната појава. Чили пасе само трева и повремено ужива во колачи. Јуницата која е висока, речиси колку што е и долга живее во Ferne Animal Sanctuary во Чард, откако нејзините сопственици ја оставиле на прагот на прифатилиштето, кога таа била стара само шест дена.

Девет години подоцна, Чили продолжила да расте и персоналот смета дека ќе го собори рекордот на најголема крава во Британија.

„Додека Чили растеше забележавме дека е поголема од станатите. Сега се истакнува со своите 198 сантиметри“, изјави Наоми Кларк, која го води прифатилиштето.

Чили е долга нешто повеќе од два метра, а во прифатилиштето е оставена со сестрата близначка Џубиле во 1999 година.

„Не знаеме зошто е толку висока. Не јаде премногу, а главата и нозете и се пропорционални со телото. Многу е нежна и пријателски расположена кон останатата стока“, вели Наоми Кларк.

(Д.Т)