Британецот Хенри Алингам, чиј живот се протега низ три века и е сведок на промената на шест британски монарси, својот 112 роденден го прослави присуствувајќи на демонстративниот лет на авионот „спитфајер“, легендарното летало на Кралското воздухопловство во времето на битката за Британија во 1940.

Најстариот човек во Европа е роден во 1896 година, кога во Атина се одржале првите модерни Олимписки игри. Учествувал во битката кај Јутланд, најголемата поморска битка во Првата светска војна, а подоцна работел во фабриката за автомобили Форд.

Сега живее во домот за ветерани во Сасекс, на југот на земјата.

„Се чувствувам како на облаци. Кој не би се чувствувал така со сите тие добри луѓе кои се грижат за мене“, изјавил Алингам.

Кога ќе го прашате која е тајната за долговечен живот, Алингам вели дека рецептот е прост, само треба до него да се придржувате.

„За мојата долговечност заслужни се вискито, цигарите и многу, многу слободните жени“, вели низ смеа Алингам.

(Д.Т)