Белгискиот архитект Винсент Колбаут има иновативна идеја како да се реши проблемот со подигањето на нивото на морето – град кој плови.

Самоодржливиот град наречен „Lilypad“ би требало да биде дом на околу 50.000 таканаречени климатски бегалци од најпогодените подрачја, вклучувајќи го и Лондон.

Последните истражувања покажуваат дека нивото на морето би можело да да се подигне за 88 сантиметри до 2100 година, загрозувајќи ги островите во Тихиот Океан.

Овој драстичен скок на нивото за речиси еден метар претставува закана за нискокрајбрежните подрачја како за големите градови кои се наоѓаат во тие подрачја, како што се Лондон, Њујорк и Токио.

Футуристичкиот пловен град „Lilypad“, или „екополис“ како што милува Калбаут да го  нарече, нуди драгоцено решение за големиот проблем со подигањето на нивото на морето. Кога големите крајбрежни градови ќе се поплават, „Lilypad“ ќе може да ги собере нивните жители и ќе плови низ светските води.

„Некои градови трошат милиони долари за да ги зголемат своите плажи и за да ги зацврстат своите насипи. Но, „Lilypad “ е долгорочно решение на проблемот со нивото на морето“, вели архитектот.

Сместен околу јадрото кое ќе ја собира и прочистува дождовницата, „Lilypad“ ќе плови низ светските мориња, следејќи ја океанската струја и ветровите. Градот ќе биде опремен со три пристаништа, а исто така ќе има и планински подрачја каде жителите ќе можат да отидат за да ја сменат околината. Енергијата ќе ја добива од обновливите извори како што се сонцето, ветерот и водата. „Lilypad“ ќе биде самоодржлива еколошка инфраструктура.

Градот ќе произведува повеќе енергија отколку што ќе може да потроши. Ќе биде целосно еколошки со оглед на тоа што јаглерод диоксидот и отпадот ќе бидат рециклирани.

„Целиот град ќе биде прекриен со растенија и висечки градини, ќе нема сообраќај и автомобили. Целта е да се создаде коегзистенција меѓу луѓето и природата. Мислам дека проблемот со сместувањето на милиони луѓе кои ќе станат бездомници поради климатските промени е еден од најголемите предизвици на 21 век“, вели Калбаут.

Засега не се знае колку ќе чини изградбата на таквиот град, ниту пак колку ќе чини живеењето во него.