Секој Британец издвојува по 69 пени за кралското семејство
За издржувањето на кралското семејство, секој Британец во минатата година издвоил по 69 пени или три пени повеќе отколку во претходната година, покажуваат службените податоци што денеска ги објави Бакингамската Палата.
Според соопштението на финансиските служби што се грижат за сметките на кралицата и на нејзиното семејство, минатата година се потрошени 41,5 милиони фунти од државните пари за оваа намена, при што е забележано зголемување на трошоците за 1,5 милион фунти, јави дописникот на МИА од Лондон.
Во истиот период е забележано и зголемување на извлекувањето пари за потребите на кралското семејство од т.н. цивилна листа, што е уредена уште во почетокот на деведесеттите години од 20 век во време на Владата на премиерот Џон Мејџор и што одново ќе се преразгледува идната година. Најголемиот дел од овие пари се дадени за платите на персоналот и службите на кралското семејство.
Минатата година кралската куќа објави дека издршката на кралицата и нејзиното семејство ги чини Британците помалку од цената за литар млеко.
Во годинешниве трошоци од 41,5 милион фунти, не се пресметани давачките за обезбедувањето што го врши полицијата и армијата, како и за церемонијалните обврски на војската, што одат на нејзин трошок.
Најголем поединечен трошок кралското семејство има направено за патувањата, на неговите членови, а пред се на престолонаследникот Чарлс и неговата сопруга војвотката од Корнвол. За оваа намена се потрошени 6,5 милиони фунти, односно 300 илјади фунти повеќе од претходната година, поради далечните прекуморски турнеи на принцот.
|