Два духа во шише се продадени на аукција на Интернет за 2.830 новозеландски долари (околу 1.500 евра), пишува лондонскиот весник „Телеграф“.

Духовите, заробени во две стаклени шишиња, на продажба ги ставила Ејви Вудбери од Крајстчерч, на Јужниот Остров на Нов Зеланд.

Таа објасни дека духовите се фатени за време на егзорцизам во нејзината куќа и дека шишињата потоа се измиени во осветена вода со цел да се „намали моќта на духовите“.

Станува збор за дух на повозрасен маж кој живеел во куќата во текот на 20-тите години од минатиот век и немирниот дух на едно девојче кој се појавил за време на сеансата на повикување духови.

Необичната аукција го привлекла вниманието на повеќе од 200.000 посетители на Интернет аукцијата, кои оставиле интересни коментари, како: „И јас дома имам два духа во шише. Мислам дека се викаат Џим Бим и Џони Вокер“.