Karaxhiqi paralajmëroi se do të paraqitet në gjykimin para Tribunalit të Hagës

Hagë, 3 nëntor (MIA) - Ish-lideri i serbëve boshnjakë, Radovan Karaxhiq paralajmëroi se sot do të paraqitet në gjykimin para Tribunalit të Hagës.

I akuzuari për gjenocid dhe krime lufte bojkoton procesin gjyqësor nga fillimi i javës së kaluar, duke u arsyetuar se i nevojitet më shumë kohë që ta përgatisë mbrojtjen e vet.

Sipas paralajmërimeve, në gjykimin e sotëm do të shqyrtohen mënyrat për gjetjen e zgjidhjes për situatën parrugëdalje.

Njëri nga këshilltarët e Karaxhiqit, Marko Slladojeviq të hënën tha se ai do të paraqitet në gjykatë për shkak se dëshiron të ndihmojë për gjetjen e zgjidhjes për problemin.

Karaxhiqi hodhi poshtë të gjitha aktakuzat kundër tij, duke përfshirë edhe të dyja aktakuzat për gjenocid për vrasje të tetë mijë burrave muslimanë nga Srebrenica.