Samit për Ballkanin Perëndimor në Trieste

Trieste, 12 korrik 2017 (MIA) - Bashkëpunimi në infrastrukturë, komunikacion dhe energjetikë dhe mundësitë për stimulimin e rritjes ekonomike përmes lidhjes së këtyre sferave me qëllim të përafrimit të Ballkanit Perëndimor ndaj BE-së, do të jenë temat kryesore të Samitit që do të mbahet sot në Trieste si vazhdim i Procesit të Berlinit.
Në Samitin e katërt në kuadër të Procesit të Berlinit do të marrin pjesë kryetarë apo anëtarë të qeverive të Maqedonisë, Shqipërisë, Bosnjë e Hercegovinës, Kosovës, Serbisë dhe Malit të Zi, si dhe përfaqësues të lartë të Austrisë, Sllovenisë, Italisë, Kroacisë, Gjermanisë, Francës dhe Britanisë së Madhe.
Siç njofton Tanjug, në takim është paralajmëruar edhe prania e përfaqësueses së lartë për Politikë të Jashtme dhe të Sigurisë e BE-së, Federika Mogerini.
Procesi i Berlinit u inicua në vitin 2014 nga kancelarja gjermane, Angela Merkel, ndërsa pas Berlinit ky samit u mbajt në Vjenë dhe Paris.
Qëllimi i Samitit në Trieste është përmes nxitjes së dimensionit të bashkëpunimit në sfera të rëndësishme të vendoset hapësira rajonale ekonomike.
"Funksionimi i mirë i rrjetit të infrastrukturës e nxit rritjen ekonomike, ofron mundësi për biznes, tërheq investime dhe krijon vende të punës", thuhet në dokumentin e punës.
Në margjinat e Samitit do të mbahet edhe Forum biznesi, që duhet të ndihmojë në stimulimin e projekteve ekonomike të Ballkanit Perëndimor.
Me ndihmën e Bankës Evropiane për ripërtëritje dhe zhvillim (BERZH) dhe Bankës Evropiane për investim (BEI) rajoni në dispozicion duhet të fitojë 500 milionë euro për investime të mëtejme në projekte.