Daçiq dhe Bërnabiq për çështjen e Kosovës Beograd, 23 mars 2018 (MIA) - Ministri i Jashtëm i Serbisë, Ivica Daçiq, ka deklaruar se nuk pret ndonjë gjë nga vazhdimi i sotëm dialogut në Bruksel. Daciq, për mediat serbe sot deklaroi se është skeptik sa i përket këtij takimi përderisa ka shfaqur dyshimet e tij për bashkësinë ndërkombëtare. "Gjithmonë kam thënë se bashkësia ndërkombëtare po e gënjen Vuciqin. Është e vërtetë se ka diçka të shkruar që nga viti 2013, për të arritur një marrëveshje ligjore të normalizimit, por askush nuk e ka shpjeguar ndonjëherë se çfarë ka në këtë marrëveshje", është shprehur Daçiq. I pyetur në lidhje me disa raportime të mediave serbe se ky shtet ka një ultimatum "ose Kosova në OKB, ose bllokadë", Daçiq e mohoi një gjë të tillë. "Është e pamundur që të ndodhë një gjë e tillë" u shpreh ai. "Mund të ketë presione, mirëpo në qofte se dikush mendon se Vuçiq do e njohë Kosovën, nuk e njeh as Vuçiqin as Serbinë" ka deklaruar ministri Daçiq, raportojnë mediat serbe. Për çështjen e Kosovës sot u prononcua edhe kryeministrja Ana Bërnabiq e cila tha se lidhur me këtë çështje duhet të "merren parasysh pozicionet e të dy popujve". Bërnabiq tha se Serbia është e gatshme të marrë pjesë në zgjidhjen e problemit në mënyra të matura dhe të përgjegjshme, por Serbia nuk do ta njohë ekzistencën e një shteti tjetër në territorin e saj.
|