KFOR-i i gatshëm t'i mënjanojë barikadat nëse atë nuk e bëjnë serbët

Beograd, 1 dhjetor 2011 (MIA) - Zëdhënësi i KFOR-it, Uve Novicki sot deklaroi se KFOR-i do t'i mënjanojë barrikadat në pjesën veriore të Kosovës nëse atë nuk e bëjnë serbët.

"Zgjidhja mund të jetë që të gjithëve t'u garantohet liri e pakushtëzuar e lëvizjes, përfshirë edhe KFOR-in. Por nëse kjo nuk ndodhë, gjithsesi KFOR-i do të sillet si edhe në të kaluarën dhe nëse ka nevojë për atë vetë do t'i mënjanojmë barikadat nëse ju nuk e bëni këtë", theksoi Novicki.

Ai vlerësoi se marrëveshja mund të arrihet vetëm në nivel politik, ndërsa rezultatet mund të arrihen vetëm me bisedime.

Novicki shfaqi shpresë se përfaqësuesit e KFOR-it dhe kryetari i komunës së Zubin Potokut, Sllavisha Ristiq në takimin e nesërm në këtë komunë do të arrijnë rezultate.