I ftohti polar vret 21 persona në SHBA

Uashington, 8 janar 2014 (MIA) - I ftohti polar në Shtetet e Bashkuara ka kaluar nga perëndimi në lindje dhe veri të vendit, duke vendosur rekord në temperatura të ulëta, nga Bostoni në Birmingam, duke lënë 21 persona të vdekur, njoftojnë autoritetet.

Disa pjesë të shtetit, kanë përjetuar temperatura që janë më të ulëta sesa në Antarktik.

Në këtë fenomen, për të cilin sinoptikët thonë se nuk është edhe aq i pazakonshëm, të gjitha 50 shtetet amerikane kanë përjetuar temperatura ngrirëse gjatë të martës.

Këtu përfshihet edhe Havai, ku termometri ka regjistuar temperaturën prej - 8 gradë celzius në majën e Mauna Kea, që është një vullkan i fjetur.

Në Nju-Jork, ndërkaq i ftohti arriti në -12 gradë, kurse në Boston -18 gradë celzius.