Pas Samitit të NATO-s, Tramp për vizitë në LondërLondër, 12 korrik 2018 (MIA) - Presidenti amerikan, Donald Tramp, sot nis një vizitë dyditëshe në Mbretërinë e Bashkuar – të parën në këtë vend si president shteti. Britania e Madhe është në "trazira" dhe "varet nga njerëzit atje" nëse Tereza Mej mbetet kryeministre, tha Tramp para vizitës, transmeton Radio Evropa e Lirë.
Ai arrin në të njëjtën ditë kur Qeveria britanike publikon Letrën e saj të Bardhë me më shumë detaje nga plani kontrovers i kryeministres Mej për marrëdhëniet e Britanisë me Bashkimin Evropian, pas Brekzitit. Më herët, Tramp ka shprehur simpati për Brekzitin, apo daljen e Britanisë nga BE-ja dhe ka thënë se do të bëjë marrëveshje të shpejtë tregtare me Mbretërinë e Bashkuar sapo të largohet nga blloku. Procesi i Brekzitit duhet të përfundojë deri më 29 mars të vitit të ardhshëm. Qeveria Mej është lëkundur këtë javë, pasi dy ministra kanë dhënë dorëheqje, duke shprehur pakënaqësi me planin e kryeministres për marrëdhëniet e ardhshme me BE-në. Boris Xhonson dhe Dejvid Dejvis kanë thënë se plani do ta mbajë Britaninë të lidhur ngushtë me BE-në dhe se do ta bëjë më të vështirë për të që të bëjë marrëveshje tregtare me vendet si SHBA-ja.
|