Ministri Ademi vizitoi SH.F. "Faik Konica" në fshatin Sllupçan të Likovës

Shkup, 17 tetor 2014 (MIA) - Ministri i Arsimit dhe Shkencës, Abdilaqim Ademi dhe kryetari i komunës së Likovës, Sadulla Duraku, sot vizituan shkollën fillore "Faik Konica" në fshatin Sllupçan, që u rikonstruua me grantin e Ambasadës së Japonisë në Republikën e Maqedonisë.

Bashkëpunimi, siç njofton Sektori për marrëdhënie me opinionin i MASH, në mes Komunës së Likovës dhe Ambasadës së Japonisë në Republikën e Maqedonisë, ka kontribuuar që nxënësit e Shkollës Fillore "Faik Konica" në Sllupçan të ndjekin mësimin në klasa të reja moderne, të pajisura me materiale bashkëkohore, që do t'u ndihmojnë në procesin edukativo-arsimor, ka thënë ministri Ademi, duke potencuar që Komuna e Likovës është një nga të rrallat në vend, që përmes donacioneve në territorin e saj arriti të sigurojë rikonstruimin e objektit shkollor.

Ministri i Arsimit dhe Shkencës, më tej ka thënë se shpreson që shembullin e Komunës së Likovës të ndjekin edhe komunat e tjera dhe në mënyrë të pavarur të arrijnë përmirësimin e kushteve në shkollë, me çka, siç shton, do t'ua përafrojnë standardet evropiane dhe bashkëkohore nxënësve të tyre.