“Heroi”, më i miri në festivalin filipinas

Prishtinë, 29 janar 2015 (MIA) -  Filmi "Heroi" i regjisorit kosovar Luan Kryeziu, që shpalos historinë e një ish-luftëtari të Ushtrisë Çlirimtare të Kosovës, ka marrë çmimin kryesor në edicionin e parë të "Ichill Manila International Film Festival" në Filipine.

Festivali filipinas, i cili mëton të vetëdijesojë audiencën për mënyrat e reja të realizimit të filmave, sivjet ka realizuar edicionin e parë.

Filmi nga Kosova në kategorinë e filmit më të mirë ka mposhtur filmat “Dystopia ST”, “Kiko’s Paradise”, “The Imperfect Cradle”, “Aceito”, “N+N”, dhe “God is American”. Por, të gjithë janë mposhtur nga filmi nga Kosova. “Heroi” gjithashtu ishte i nominuar edhe në kategorinë për aktorin më të mirë.

Në dhjetor të vitit të kaluar, “Heroi” që ka protagonist aktorin kosovar me nam botëror, Arben Bajraktaraj, doli fitues i festivalit “Albanian Film Fest” në New Jork, ndërsa gjatë këtij muaji ka filluar të shfaqet nëpër kinematë e Shqipërisë.

Në gusht të këtij viti, “Heroi” i bashkëfinancuar nga Qendra Kinematografike e Kosovës pati premierën ndërkombëtare në edicionin e 38-të të festivalit “Montreal World Film Festival”.

Në këtë festival “Heroi” nuk ka qenë në garë për çmimet e festivalit, por është shfaqur në kuadër të kategorisë “Focus on World Cinema”. “Heroi” ka drejtor fotografie Roger Simonsz, i njohur për filma të njohur si: “The Devil Wears Prada”, “Rushhaur 3”, “Sex and the City” etj.

Në filmin “Heroi” luajnë edhe Çun Lajçi, Salahudin Bilali, Enver Petrovci, Xhemi Aga etj.