BE, SHBA, OSBE dhe NATO: Të mos lejohet ngjarja në Kumanovë t'i shkaktojë dëm shoqërisë

Shkup, 10 maj 2015 (MIA) - Besojmë fuqimisht se nuk guxohet të lejohet kjo ngjarje t'u shkaktojë dëm marrëdhënieve në shoqëri. Gjithashtu, shpresojmë se ky do të jetë momenti në të cilin liderët e vendit së bashku do të angazhohen në dialog për të gjitha çështjet me të cilat po ballafaqohet vendi, duke përfshirë edhe krizën e zgjatur politike dhe reformat e domosdoshme.

Kjo theksohet në kumtesën e përbashkët nga Delegacioni i BE-së, Ambasadës së SHBA-së, Misionit të OSBE-së dhe të Misionit të NATO-s në vend lidhur me ngjarjet e fundit në Kumanovë.

"Përfaqësuesit politik zyrtar këtu dhe në rajon e dënuan dhunën. Kjo e përforcon mirëkuptimin tonë se grupi i armatosur në Kumanovë është fenomen i izoluar", thuhet në kumtesë.

Njëherit, në kumtesë shprehet keqardhje e thellë për jetët e humbura në operacionin në Kumanovë, i cili për fat të mirë ka përfunduar. "Mendimet tona janë me familjet e policëve të cilët u vranë në operacionin dhe me qytetarët të cilët ishin të prekur nga dhuna", qëndron në kumtesë.