На аукција во Беверли Хилс се продадоа делови од сценската гардероба на покојниот крал на поп музиката Мајкл Џексон, вклучувајќи и една од неговите славни ракавици, соопштија американските медиуми.
Белата ракавица, носена од Џексон на негова турнеја, кога го промовираше албумот „Bad“, на крајот од 80-те години на минатиот век, беше продадена за 330.000 долари.
Едната страна на ракавицата е покриена со кристали Сваровски.
Палто со потписот на Мајкл Џексон беше купено за 96.000 долари, а меката шапка, што понекогаш ја носеше на сцената, за 72.000 долари.
На наддавањето беа понудени и работи, што им припаѓале на други познати лица. Така, на пример, блузата во воен стил, со која Џон Ленон се снимал за корицата на списанието „Life“ во 1966 година, беше продадена за 220.000 долари.
Двете празни шишенца од лекарства на Мерлин Монро најдоа купувач за 18.750 долари.
На аукцијата беше продадена и рендген снимката на мозокот на Алберт Ајнштајн, за која купувачит изброја 38.000 долари.
Наддавањето беше организирано од калифорниската аукциска куќа Џулианс, која соопшти дека за двата дена наддавање биле продадени работи на познатите лица во вкупна вредност од три милиони долари.