Moskë, 18 janar 2022 (MIA) - Kisha Ortodokse Ruse (ROC) ka shpikur 39 lutje të reja, duke përfshirë një për njerëzit e “fiksuar pas kompjuterëve”.
Nisma iu dorëzua në fund të vitit të kaluar Komisionit Sinodik-Liturgjik - organi suprem drejtues i RPC. Shumica e sugjerimeve përfshijnë lutjet për operacione të suksesshme, marrjen e provimeve, fillimin e studimeve dhe madje edhe kërkimin e punës. Nëse komisioni miraton propozimet, lutjet do të bëhen pjesë e praktikave liturgjike dhe ata që shkojnë në kishë do të mund t'i kërkojnë ato lutje.
Përveç kësaj, ndër lutjet e reja është edhe lutja për njerëzit që janë “të fiksuar nga pasioni për kompjuterët”. Kjo vlen edhe për lojtarët. Kjo vjen në një kohë kur varësia nga video lojërat njihet zyrtarisht si një çrregullim i rrezikshëm shëndetësor në Rusi.
Edhe Organizata Botërore e Shëndetësisë e ka shpallur këtë varësi si çrregullim të shëndetit mendor në vitin 2018. Megjithatë, sipas OBSH-së, varësia mund të diagnostikohet vetëm nga personeli mjekësor i kualifikuar dhe simptomat duhet të jenë të pranishme për të paktën një vit dhe duhet të kenë një ndikim negativ në familje, shkollë, punë, aftësi sociale dhe segmente të tjera të jetës.