Tiranë, 24 mars 2017 (MIA) - Revista prestigjoze People ka përzgjedhur pikërisht Linda Halimin për ta bërë pjesë të kopertinës së saj, si një ndër njerëzit me historinë më të suksesshme për vullnetin dhe punën e madhe në rënien në peshë. Këngëtarja ka ndarë foton e kopertinës me ndjekësit e saj në Instagram dhe shprehet tejet e emocionuar për privilegjin e të qenit në coverin e People.
Ajo prej vitesh po qëndron në Amerikë, për të jetuar ëndrrën amerikane në fushën e muzikës. Linda Halimi këngëtarja me origjinë nga Kosova është një ndër zërat më të bukur që ne kemi. Dhe këtë e ka dëshmuar më së miri edhe përtej oqeanit, ku ishte një ndër çerekfinalistet e show-t të famshëm të këngës American Idol. Linda arriti të marrë komplimente nga pjestarët e jurisë së American Idol, një ndër të cilat është edhe Jennifer Lopez, e cila e cilësoi zërin e këngëtares shqiptare si një uragan.
Përtej zërit potent, Linda u bë e njohur në atë spektakël edhe për suksesin e saj në rënie në peshë, duke e përgjysmuar masën e saj trupore në vetëm një vit. Ndërkohë përsa i përket muzikës, Linda është këngëtarja që do të përfaqësojë Shqipërinë në festivalin Europian të këngës, “Eurosong”, transmetom ATSH.