Tetovë, 17 maj 2021 (MIA) – Me ndeshjet në xhiron e fundit të 33-të, u rrumbullaksua edhe një sezon në Ligën e parë të Maqedonisë së Veriut në futboll.
Plotësisht me meritë, kampion i ri është Shkëndija nga Tetova, ekipi që tregoi më së shumti gjatë tërë kampionatit.Tetovarët kanë ditur t’i gëzohen trofeut.
Festohej dje në stadiumin pas ndeshjes me Shkupin, e pastaj deri vonë natën tifozët tetovarë iu gëzuan trofeut të ekipit të tyre.
Mysafirë të patronit të Shkëndijës, Lazim Destani, në tribunat e stadiumit tetovar ishin edhe kryetari i Parlamentit të Maqedonisë së Veriut, Talat Xhaferi, kryetari i BDI-së, Ali Ahmeti, kryetarja e Qytetit të Tetovës, Teuta Arifi, zëvendës kryeministri Artan Grubi, ish kryetari i klubit, Abdulmenaf Bexheti dhe mysafirë tjerë.
Trofeun kampionëve ua ndau kryetari i Federatës së futbollit të Maqedonisë së Veriut, Muamed Sejdini.