Romë, 3 mars 2015 (MIA) - Roma ka siguruar një pikë në derbin përballë Juventusit me një barazim 1-1, për të mbajtur gjallë shpresën për Scudetto.
Në pjesën e parë të ndeshjes u zhvillua një lojë me tempo të lartë, ku posedimin me rreth 64% e pati Roma.
Juventusi ishte skuadër më dinake dhe me siguri të madhe në mbrojtje shpërthente në kundërsulme të shpejta, mirëpo të pasuksesshme.
Sidoqoftë, edhe pse të dyja skuadrat e kërkuan golin dëshpërimisht, nuk arritën ta tundin portën asnjëherë gjatë kësaj periudhe.
Gjërat u vështirësuan për Romën kur në pjesën e dytë mbeti me një lojtar më pak. Vassilios Torosidis (62’) ishte futbollisti fatkeq që u ndëshkua me kartonin e dytë të verdhë, duke i dhënë një goditje të lirë nga një zonë e rrezikshme Juventusit.
Këtë goditje e shfrytëzoi më së miri Carlos Tevez, i cili në stilin ‘alla’ Pirlo dërgoi topin në këndin e majtë të portës duke e lënë në gjumë portierin Morgan De Sanctis.
Teksa po afrohej fundi i ndeshjes, Syedou Keita(78’) ia prishi planet për festë Juventusit duke shënuar një gol të papritur me kokë, që u ndihmua edhe nga devijimi i Marchisios. Stadiumi Olimpico u elektrizua i tëri.
Deri në vërshëllimën e fundit të gjyqtarit, Roma shtoi presionin para portës së Juves edhe pse me një lojtar më pak, mirëpo nuk arriti të bënte asgjë.
Pas këtij barazimi, Juventus mbetet në pozitën e parë në tabelë me 58 pikë, ndërsa Roma në të dytën me 49, duke e lënë kështu ende të hapur dilemën për titull.