60.bmp)
Tiranë, 27 prill 2015 (MIA) - Vllaznia dhe Skënderbeu marrin edhe Kupën e Shqipërisë në atletike, njofton ATSH-ja.
Federata Shqiptare e Atletikës ka organizuar Kupën e Shqipërisë.
Ashtu si në kampionat, edhe këtë trofe e fituan Vllaznia për meshkuj dhe Skënderbeu për femra.
Vetëm 7 ditë më herët këto dy skuadra u shpallën kampione të Shqipërisë, duke treguar se janë më të mirat e "mbretëreshës" së sporteve në vendin tonë.
Atletet e Skënderbeut, nën drejtimin e kryetrajnerit Juxhin Çili, kanë dominuar në garat e shpejtësisë dhe në kërcim së gjati, ku kanë zënë vendet e para.
Me 71 pikë të grumbulluara në përfundim të konkurrimit, Skënderbeu është renditur në vendin e pare, duke lënë Tiranën me 53 pikë, në vendin e dytë.
Edhe Vllaznia, për meshkuj, nuk njeh limite në garim.
Nën drejtimin e kryetrajnerit Albert Marashi, atletët shkodranë kanë zënë 5 vendet e para duke marrë 142 pikë.
Si për femra, edhe në konkurimin për meshkuj, në vendin e dytë janë renditur atletët e Tiranës, që grumbulluan 68 pikë.
Atleti më i mirë i Kupës së Shqipërisë u shpall Gledis Halluni i Vllaznisë, që zuri vendin e parë në kërcim së gjati, me rezultatin 7 metra e 36 centimetra. Për femra, sportistja më e mirë u shpall Luiza Gega, që triumfoi në garën e 1500 metrave.