Majami, 1 prill 2017 (MIA) - "Ferari" i kuq i dikurshëm i Donald Trampit sot do të shitet në ankand në shtetin amerikan Florida, me çmim fillestar midis 250 dhe 350.000 dollarë, transmetuan mediat franceze.
Vetura "Ferari F430" që Tramp e ka blerë në vitin 2007 dhe e ka poseduar katër vite, i ka tërhequr shikimet e adhuruesve të automobilave dhe të njohësve të politikës.
"Ka shumë pritje për vlerën e kësaj veture", deklaroi përfaqësuesi i shtëpisë së ankandeve "Auctions America", të specializuar për ankande të automobilave klasike.
Donald Tramp me siguri është presidenti i vetëm amerikan, i cili ka poseduar superautomobil, vëren Shtëpia e ankandeve.
Tramp me të ka kaluar afër 4.000 kilometra edhe atë në kohën kur ishte magnat për prona të patundshme.
Emri i pronarit të tij të tanishëm nuk kumtohet.