Група кинески и турски научници објавија дека најверојатно ја принашле Ноевата арка на врвот на 4-илјади метри надморска височина на планина Арарат во Турција.
Научниците истакнаа дека се пронајдени дрвени остатоци во кои била тестирана старосната граница на јаглеродот и за кои се претпоставува дека се остатоци од арката стари 4.800 години што се поклопува со времето на Големиот потоп на Земјата.
- Не можеме да речеме дека тоа 100 % е арката на Ное, но 99,9 % сме сигурни. Древната структура има неколку прегради со дрвени греди во кои веројатно биле сместени животните, изјави Јанг Винг Ченг, режисер од Хонг Конг и член на истражувачкиот тим.
Локалните научници побараа од владата во Анкара планината Арарат да ја воведе на листата на UNESKO, бидејќи овој реон е едно од најинтересните места полно со археолошки наоѓалишта.
Според Библијата во времето на Големиот потоп Бог му наредил на Ное да изгради брод во кој ќе бидат сместени по две животни од секоја раса. Се претпоставува дека по поплавата водата се повлекла, а бродот останал на копно. Многу веруваат дека таа останала на планината Арарат бидејќи таа планина е највисока точка во регионот.
