Тајната на издржливоста на Кинескиот ѕид се крие во лепливиот ориз кој работниците за време на владеењето на династијата Минг го употребувале како малтер, открија кинеските научници.
- Големиот Кинески ѕид е изграден пред 600 години, а за негова изградба бил употребуван мешавина од леплива ориз паста и вар. Древниот малтер е специјализиран вид на органска и неорганска мешавина. Органската смеса е амилопектин направена од лепливиот ориз, а неорганската смеса всушност е калциум карбонат, објасни Жанг Бинџијан, професор по хемија на Универзитетот Хангжу во Источна Кина, додавајќи дека амилопектинот помогнал во креирањето на компактната микроструктура која овозможила Кинескиот ѕид да биде стабилен и да има поголема механичка цврстина.
Жанг напомнал дека употребата на лепливиот ориз во времето на династијата Минг претставува најголемо техничко достигнување. Лепливиот ориз се користел и во градењето на гробници и ѕидови отпорни на земјотреси и други природни катастрофи, пренесува Daily Telegraph.
Меѓутоа, во тоа време граѓаните на јужна Кина негодувале поради изградбата на ѕидот и другите градби бидејќи им бил запленуван оризот со цел да се нахранат работниците и да се изгради ѕидот.