Пронајдени пештерски цртежи стари 35.000 години

Романските археолози ги пронајдоа најстарите цртежи во пештера во Централна Европа стари околу 35.000 години, објавија романските и француските научници.

Цртежите ги прикажуваат животните како што се бизон, коњ, па дури и носорог.

- Ова е прв пат да во централна Европа се пронајдат и да се потврдат вака стари цртежи, се наведува во заедничкото соопштение на романската Федерација на археолози и Жан Клот, експерт при УНЕСКО.

Станува збор за големо откритие чија автентичност е несомнена, изјави Клот, експерт за праисториска уметност, кој беше повикан од страна на романските археолози со цел да го потврди откритието.

Во тимот на Жан биле и експерти за проучување на пештери, палеонтолог, археолог и двајца експерти за пештерска уметност. Според нивните процени, се работи за период таканаречен камена уметност.

Цртежите во црна боја се откриени пред четири месеци во пештерата Coliboaia, на северозападна Романија и претставуваат животни, изјави шефот на романската Федерација, Виорел Траиан Ласку.