Луѓето веќе 50 години летаат во Вселената, но за тие пет децении космонаутите ниту еднаш не се впуштиле во сексуални односи, тврдат руските научници и американските космонаути.
Веќе со години кружат гласини дека астронаутите учествувале во таен американски или руски „сексперимент“, но Валериј Богомолов, заменик директор на Биомедицинскиот институт во Москва уверува дека тоа е само плод на имагинацијата.
- Нема ни официјални, ниту неофицијални докази дека имало случаи на сексуални односи или сексуални експерименти во Вселената. Во најмала рака, тоа не било во историјата на руските и советските истражувања, изјави Богомолов.
Тој со извесно оградување, прифати и да ги коментира гласините за американските експерименти со секс во Вселената.
- Што се однесува до нив, немам информации кои би можел категорички да ја побијам таа вест. Постојат само анегдоти, гласини кои не се вредни за верување, додаде Богомолов.
НАСА не забранува секс во Вселената, но кодексот на однесување на американските астроанути ги повикува на „однос на доверба“ и одржување на „професионални стандарди“ во сите ситуации. Лирој Чиао, ветеран со четири вселенски мисии во период од 1994-та до 2005-та вели дека НАСА нема специјални правила по оваа тема.
- За тоа не сме дискутирале додека јас бев во Вселената. Едноставно се подразбира дека тоа не се прави. Ако било нешто такво до сега сите ќе знаевме, вели Чиао, кој во Вселената поминал 229 дена, и тоа без секс, ако му веруваме.