Во светот постојат неколку клиники во кои се вршат најбараните естетски операции. Станува збор за операција за продолжување на нозете. Овие операции ќе им помогнат на ниските луѓе да се ослободат од комплексот, доколку го имаат.
Британската телевизиска куќа Sky News ја пренесе приказната за 23-годишната Тања која одлучила да се оперира, бидејќи отсекогаш сакала да биде висока. Иако во ходниците на болницата, поради шипките во нозете, изгледа како да преживеала тешка сообраќајна несреќа, Тања вели дека тоа ни малку не и пречи бидејќи знае дека за неколку месеци ќе биде за 10 сантиметри повисока.
Операцијата ќе ја чини младата Тања 25.000 евра и девет месеци од нејзиниот живот. Процедурата за продолжување на нозете не е едноставна особено затоа што вклучува ставање метални шипки во нозете. Шипките претставуваат своевидно скеле кое го потпомага зараснувањето на скршената коска. По зараснувањето, коските стануваат подолги.
За операциите, при кои се кршат совршено здравите нозе и понатаму се водат многу дебати, а многумина сметаат дека не е етички да се прават такви зафати.
- Кога ќе ми дојде пациент со такво барање, се обидувам да ги убедам дека тоа не е в ред. Но, тие потоа почнуваат да зборат за нивните уништени сништа и едноставно е невозможно да се смени нивното мислење и да се натераат да се откажат, вели рускиот хирург Константин Навиков, кој верува дека денеска може да се намали носот, да се зголемат градите и не гледа ништо спорно во продолжувањето на нозете.
Кога металните шипки ќе ги скршат коските, тие повторно почнуваат да зараснуваат со брзина од еден милиметар на ден. Целиот процес е особено болен за пациентите, но тие пак велат дека тоа е „болка на уживање и среќа“, после која ќе се чувствуваат многу подобро и посамоуверено.