Радијацијата од нуклеарните централи и тестирањето на бомби предизвикаа милионско намалување на бројот на новородени девојчиња низ светот, покажува најновото истражување.
Германските научници сметаат дека нуклеарните катастрофи, како таа во Чернобил пред 25 години, имаат големо влијание врз полот на новороденчињата. Тие извршиле анализа на податоци на популацијата на САД и уште 39 европски држави за периодот од 1975 до 2007 година.
Во сите земји е регистрирано зголемување на бројот на новородени момчиња во однос на девојчиња, споредено со периодот од 1964 до 1975 година. Тоа е особено нагласено во земјите од источна Европа неколку години по 1986 година и катастрофата во Чернобил. Последиците од нуклеарната хаварија во Чернобил поради далечината не се забележани во САД, но тие значително се чувствуваат во земјите кои се во близина на Украина.
Во овој период, значително поголем број на машки деца се родени во Белорусија, која е сосед на Украина, во споредба со Франција. Резултатите добиени со ова истражување во голема мера покажуваат како може да изгледа иднината во случај на нова нуклеарна катастрофа. Врз основа на добиените резултати со право се очекува зголемен број на машки деца во Јапонија, а можеби и на американскиот западен брег, по експлозијата на реактор во нуклеарната центрaла „Фукушима“.
Не знаеме во кој степен е радијацијата емитувана од нуклеарната централа „Фукушима“. Можеби последиците ќе бидат ограничени само на Јапонија, но доколку има значителна радијација и во водата и воздухот, тогаш особено американскиот западен брег може да биде загрозен, сметаат експертите.
Во нормална состојба, машките новороденчиња се во незначително поголем број од женските. Истражувањето покажува зголемување во корист на машките деца под влијание на радијацијата. Иако, процентот помал од еден отсто делува незначотелно, важно е да се нагласи дека е потребно многу време работите да се вратат во нормала по радијацијата, објави весникот „Дејли мејл“.