Операцијата на мозок не е воопшто едноставна процедура – една грешка и пациентот може да заврши со трајно оштетување на мозокот.
Истражувачи од Универзитетот во Јута сакаат да изнајдат начин за да ги намалат шансите од човечка грешка, а тоа мислат да го постигнат со робот кој оваа комплицирана процедура може да ја заврши за 50 пати побрзо отколку просечен хирург. Тој е способен да издупчи череп за само 2,5 минути, во споредба со 2 часа кога тоа би се изведувало од човек.
Истражувачкиот тим вели дека овој робот е „доказ на принципот“ дека е способен да извршува комплексни операции – тој е воден околу чувствителните области на черепот преку податоци превземени од ЦТ-скенови (од компјутерска томографија) и внесени во неговото програмирање. Овие скенови ја покажуваат локацијата на нервите и вените кои роботот мора да ги избегнува.
Покрај очигледните способности за спасување животи кои една ваква машина би ги имала, со нејзина помош потенцијално би можеле да се заштедат големи суми на пари, бидејќи краткото траење на одредени операции ќе овозможи намалување на нивните цени, како и на времето кое пациентот го поминува под анестезија, што исто така може да предизвика дополнителни компликации.
Роботиката и автоматизацијата полека но сигурно го трансформираат начинот на кој што докторите ги вршат операциите. На некои пациенти иницијално може да им биде одбивна помислата машина да ги сече и отвора, меѓутоа овие роботи се способни да изведуваат операции со прецизност која човекот е невозможно да ја постигне.