Познато е дека мајчиното млеко е подобро за бебињата (во однос на нутритиентите кои ги содржи) во споредба со вештачкото млеко, т.е формула, меѓутоа поради разни причини доењето не е секогаш возможно за некои жени.
Во ново истражување била откриена една од клучните компоненти која го прави мајчиното млеко толку хранливо, со што е отворена можноста за креирање на подобрена беби формула со карактеристики скоро идентични на мајчиното млеко.
Мајчиното млеко не содржи само калории за „здебелување“ на бебето, туку е полно и со разни други компоненти како на пример бели крвни клетки кои помагаат во борбата против инфекциите, како и специјални нутриенти кои помагаат за изградба на здрав стомачен микробиом, што пак помага во креирањето на посилен имунолошки систем. Некои од овие состојки играат и централна улога во развивањето на мозокот.
Една од компонентите на мајчиното млеко се капките маст обвиткани со мембрана која содржи протеин, шеќери и липиди. Иако сè уште не е целосно познато зошто овие нутритиенти во мембраната на млечната маст (MFGM) се толку важни, нив ги нема во многу мешавини на беби формула.
За да ја потврдат важноста на MFGM нутритиентите, истражувачите направиле контролирана клиничка студија врз скоро 300 новороденчиња во Кина, од кои половината биле хранети со стандардна формула, додека другата половина во формулата имала додадено MFGM од крава.
Се покажало дека MFGM формулата дала импресивни резултати – новороденчињата кои ја пиеле имале повисок степен на развој на мозокот на возраст од 4 до 9 месеци, подобро одржување на вниманието на возраст од 1 година, и малку подобри јазични вештини на возраст од 18 месеци. Покрај сето тоа, имали помалку гастроинтенстинални и респираторни проблеми.