NASA ја истражува можноста за користење на човечки екипаж за првото лансирање на нивната најмоќна ракета досега, наречена Вселенски лансирачки систем (SLS – Space Launch System), што драматично би ги забрзало плановите за враќање на човекот на Месечината, а еден ден и негово стапнување на Марс.
Во голем пресврт (бидејќи до сега се сметаше дека ќе биде без човечки екипаж), вселенската агенција размислува за вметнување на астронаути во истражувачката мисија 1 (EM-1), закажана за септември 2018-та, која ќе биде орбитална мисија кон Месечината.
Пред оваа објава, патувањата со екипаж на SLS и придружната капсула Орион биле планирани најрано за 2021-ва.
Постоечкиот план за оваа мисија бил таа да трае околу 3 недели, за кое време Орион капсулата (без екипаж) би собирала податоци додека 6 дена орбитира околу Месечината на далечина од околу 70 000km.
Додавањето на екипаж е можно да го скрати времетраењето на мисијата, и таа да биде многу слична на онаа на Аполо 8 во 1968-ма – првиот пат кога човечки екипаж орбитирал околу Месечината.
За да тоа се оствари ќе претстои многу работи, бидејќи Орион капсулата моментално нема систем за одржување на живот, а SLS ракетата не е целосно оценета како безбедна за лансирање со човечки екипаж во неа.
Доколку овие пречки се надминат, мисијата EM-1 ќе служи како тест за EM-2, која треба да се оствари 3 до 5 години подоцна, и со која за првпат после 1972-ра, астронаути на NASA би зачекориле на површината на Месечината.