Архитекти базирани во Њујорк откриле планови за градење на облакодер кој ќе виси од астероид на височина од 50 000 километри.
Архитектонското студио Clouds Architecture Office ги објавиле скиците за кулата Аналема, која покрај тоа што ќе биде „обесена“ на астероид, ќе биде и највисоката во светот.
Според нивниот сајт, таа ќе користи универзален орбитален систем за потпора (UOSS) за да виси на астероидот со употреба на дебели кабли. Орбиталниот пат ќе трае 24 часа и ќе биде во форма на бројката 8, а ќе ја покрива јужната и северната хемисфера, патувајќи над големи градови како Хавана, Панама, Њу Јорк и др., враќајќи се во првобитната позиција на небото на крајот на секој ден.
Според објавените дизајни, кулата ќе биде повеќе како лебдечки град отколку огромен облакодер. Таа ќе биде поделена на секции, вклучувајќи ги оние за јадење/шопинг/забава во најдолниот дел, комерцијални канцеларии, градини и агрикултурен сектор, како и големи секции со станбени површини.
Таа ќе ја користи својата уникатна позиција за создавање енергија преку соларните панели, а филтрирачкиот систем кондензацијата од облаците и дождовната вода ќе ја претвора во свежа вода за пиење.
Дали овој амбициозен дизајн воопшто може да функционира, е сосема друго прашање. Како луѓето ќе патуваат и ќе се симнуваат од неа? Како ќе се однесува при екстремни временски услови? Како астероидот постојано ќе се чува во орбита блиску до земјата?
Можеби се работи за искрено футуристичко размислување, а можеби е и само иновативен ПР потег за името на компанијата да се појави „ударно“ на пазарот.
Како и да е, концептот е навистина научно фантастичен, а дали ќе се објават повеќе детали околу тоа како сето ова ќе функционира, останува да чекаме.