Остатоци од вода и „плажи“ на Марс

Марс некогаш имал океани и песочни брегови, далеку поразлични од пустите, ледени и радијациони услови коишто ги има денес, посочува истражување на научници од Пен Стејт универзитетот во САД и Универзитетот Гуангжу во Кина.

Затрупаните „плажи“ беа откриени откако научниците ги анализираа подземните снимки направени од кинескиот ровер „Журонг“. Овие податоци од северните рамнини на Марс, многу веројатно, укажува дека тука некогаш порано имало океан, според д-р Бенџамин Карденас, еден од авторите на научното истражување.

- Радарот обично забележува дури и суптилни промени во големината на седиментот, што веројатно е она што се случува овде. Тоа ви кажува дека сигурно имало плима и бранови и дека тие биле активни одреден подолг временски период... „Плажата“ се наоѓа меѓу плитката вода, воздухот и копното. Се верува дека во овие средини на Земјата животот настанал првпат и мислам дека ова е одлично место да се испрати мисија во потрага по знаци на некогашен живот, вели Карденас.

Научниците долго време дебатираат дали на Марс има океани, па ова откритие секако навестува дека тука некогаш имало такви огромни водни пространства. И досега има показатели и претпоставки за можно присуство на реки и езера, како и за течна вода длабоко под површината на „Црвената Планета“ денес.