Појавувањето на Славко Калежиќ на бината на X-Factor во улога на водител никого не го остави рамнодушен. Едни го фалат, други го „плукаат“, а медиумите пишуваат дека во следниот пренос ќе го замени Влада Станојевиќ.
- Многумина не изненади неговото појавување како водител во првата емисија во живo. Славко најпрвин беше натпреварувач, а откако Жељко Јоксимовиќ го исфрли од понатамошното натпреварување, Калежиќ стана водител, пишуваат српските медиуми.
Гледачите по завршувањето на шоуто беа поделени, на некои неговиот однос и изговорот „т.е. читањето од идиот машината“ им беше премногу нападно и вештачко, додека други го коментираа неговиот изглед. Поранешната портпаролка на Pink, телевизијата каде се емитува шоуто, Тијана Војтеховски дури на Twitter напиша дека „Славко изгледа како да носи маска од TLZP“.
Потоа, два дена по емитувањето на X-Factor одредени дневни весници објавија дека на негово место ќе дојде Влада Станојевиќ, кој дури и изјави дека е „пресреќен што ќе биде дел од оваа приказна“. За сево ова Славко преку Mondo се огласи на јавноста и се нарече „Единствен“ водител на X-Factor:
- Мислам дека целата помпа се крена бидејќи едноставно бев на висината на задачата. Утрово добив официјална потврда од продукцијата дека јас сум единствен водител на X-Factor, така да само можам да демантирам тоа што го изјави Станојевиќ, вели Славко.
За впечатоците по водителското деби овој вторник, Калежиќ вели дека искрено е пресреќен.
- Се смеам без престан, ете колку сум среќен. По првата емисија која ја водев се чувствувам неверојатно, едноставно не се опишува, јас сум и понатаму на сцената. Замислете како е да се расте со емисиите од италијанските телевизии, а потоа да се стане дел од една таква светска приказна, на такво ниво. Искрено сум пресреќен како сè помина, изјавува тој.
На воодушевениот водител не му сметаат негативните коментари.
- Не стигнав да ги прочитам коментарите, само луѓето ми праќаа кој што пишува. Јас сум веќе шест години во работата и мене тоа не ми е ништо ново, во смисла дека се шокирам или слично. Јас само можам да се заблагодарам, бидејќи правилото е – кога плукаат, тогаш си успешен. Јас искрено на сите сакам да им се заблагодарам и за негативните коментари, додава Славко.
Калежиќ сигурно повторно ќе го гледаме на бината на X-Factor веќе следната недела кога и ќе настапат нашите натпреварувачи, Даниел и Фифи.