Повеќето од нас ја знаат трагичната приказна за Титаник, бродот кој своето прво патување го започна на 10 април 1912 (со 2224 патници и членови на екипажот), а го заврши на 15 април по ударот во ледена санта по што потона, носејќи со себе 1517 животи.
Сега, компанијата Blue Star Line, сопственост на австралискиот милионер и бивш политичар Клајв Палмер, работи на создавање на реплика на овој брод со цел во 2022 да го започне своето патување и да ја следи рутата на оригиналниот Титаник.
Плановите за Титаник 2 биле објавени уште во 2012, а патот за 2016, но работата на проектот била суспендирана поради немање доволно ресурси и поради проблемите со кои неговата компанија Mineralogy ги имала со кинеската компанија Citic Limited.
Потоа, во 2016 било објавено дека Палмер земал 6 милиони австралиски долари од друга компанија (исто така во негова сопственост) за да го финансира Титаник 2, но тој ги отфрлил тие тврдења.
Сега, Blue Star Line објавиле дека недоразбирањата помеѓу Mineralogy и Citic биле решени и дека конструкцијата на репликата кој чини 500 милиони долари продолжува.
Титаник 2 има доволно простор за 2435 патници и 473 членови на екипажот и ќе биде опремен со адекватни чамци за спасување, сигурносни елеци и други мерки за сигурност.
Првото патување е закажано за 2022, кога треба да патува од Дубаи до Саутхемптон, од каде ќе ја започне оригиналната планирана рута на Титаник чија крајна дестинација е Њујорк.
Сè уште не се знае кога билетите ќе бидат во продажба, ниту пак колку ќе чинат.
Инаку, Палмер е љубител на холивудските блокбастери – во 2013 тој лансирал забавен парк наречен Палмерсаурус, инспириран од филмовите „Паркот Јура“, со 160 аниматроник диносауруси, но кој за брзо време бил затворен по лошите критики од посетителите.