Германската стартап компанија Volocopter го претстави своето летало за кое се надеваат дека ќе биде првиот летечки такси сервис на повик во светот.
Наречено VoloCity, леталото има доволно простор за 2 патници и нивниот рачен багаж, а може да полетува и слетува вертикално со помош на 18-те ротори и стабилизатор кој овозможува поголема стабилност за време на летот.
Од Volocopter тврдат дека VoloCity може да лета со максимална брзина од 110км/ч. и дека има домет од 35 километри. Тоа не е преголема далечина, но целта на леталото е да ги пренесува луѓето низ одреден град, а не на меѓуградски релации.
VoloCity е дизајниран според сите локални безбедносни стандарди и легално може да превезува патници.
Од Volocopter сега планираат да работат на градење на инфраструктурата за лансирање на комерцијален такси сервис, кој ќе вклучува полигони за полетување и слетување. За оние кои сакаат да го видат VoloCity на дело, Volocopter ќе прават јавна летечка демонстрација во Сингапур во последниот квартал од 2019.