Британскиот пронаоѓач, „летачкиот човек“ Ричард Браунинг во 2017-та година, преку својата компанија Гравити.ко го претстави костим-леталото „Џет-пек“ инспирирано од супер херојот Ironman. Сега, со помош на YouTube -ѕвездата Џејмс Бретон го опреми својот „костим” и со автоматско оружје што се управува со движење на главата.
Поради безбедносни причини, за изработката на прототипот не е користена вистинска пушка, туку вештачка, со пластични сачми. Без оглед на тоа, на конструкторите им било важно да докажат дека леталото може да се користи и како воено оружје.
Браунинг, со својот пронајдок пред две години постави и Гинисов рекорд летајќи со брзина од 51,53 километри на час. Но, притоа целиот погонски систем е сместен на рацете на пилотот.
Поради управувањето, пак, рацете не може да се користат за други функции, како на пример, снимање и пукање со оружје. Се чини и тој проблем е решен. Имено, Бретон во кацигата вградил сензор што забележува во која насока гледа пилотот и препознавајќи ги движењата на човекот, да командува со системот за управување со оружјето.
Следно што треба да се осмисли е заштитна преграда меѓу оружјето и увото, доволно силна да спречи оштетување на слухот поради рафалите на автоматската пушка.