Градот Лос Анџелес во соработка со стартап компанијата „TechniSoil Industrial“ работи на асфалтирање на една улица користејќи мешавина од рециклирана пластика и асфалт – процес со кој би можеле да се креираат патишта кои би траеле 13 пати подолго од вообичаеното.
Традиционално, кога некој пат треба да се асфалтира, му се отстранува горниот слој на асфалт и се покрива со нов асфалт кој обично е мешавина од леплив битумен и парчиња карпи, песок, и чакал.
Наместо да го користи битуменот како врзувачки агент, процесот на „TechniSoil“ користи рециклиран полиетилен терептхалат, цврст материјал кој често се користи за правење на пластични шишиња за вода и газирани пијалоци.
Наместо стариот асфалт да се фрла, компанијата користи машина наречена „рециклирачки воз“ за да го измеле, измеша со течната пластика и потоа да го постави на патот, со тоа намалувајќи ги емисиите на штетни гасови кои инаку би се произвеле со неговото транспортирање.
При градење на традиционалните патишта, за секој километар и пол пат се фрла отпад за чие отстранување се потребни 42 камиони и уште 42 за да го донесат новиот асфалт. Со новата технологија, употребата на тие 84 камиони практично се елиминира.