Антарктикот е место каде што одат само оние кои уживаат да поминуваат време на ниски температури. Токму таму има еден камп, White Desert Antarctica каде што седум ноќевања во шатор на многу ниски температури чинат 64.000 долари.
Во цената е вклучен и лет со авион од Кејп Таун во Јужна Африка, кој трае пет и пол часа, ноќевање во шатор и храна. Патувањето може да се направи само во ноември и декември, бидејќи тогаш е најтопло на Антарктикот, просечната температура е -36°С, а се спушта и до -40°.
Кампот се состои од шест шатори во кои отседнуваат по двајца. Во секој шатор има греење, спална соба, купатило и кујна. Два посебни шатори се уредени во дневна соба и трпезарија каде што може да се дружат гостите.
Гостите во текот на денот може да ја истражуваат околината, да се искачуваат по ледените карпи, да поминуваат под ледените тунели и да уживаат во разни активности. Но, најголема атракција е дружењето со колонијата од околу 6.000 пингвини, кои толку се навикнале на луѓето, што е доволно за незаборавна селфи фотографија!
Сопствениците на кампот дошле до оваа идеја откако биле на авантура на тоа место на Антарктикот во 2006 година. Тогаш четири дена во мал шатор чекале да помине невремето. Резервите храна биле мали и не им било сеедно. Разговарале за тоа зошто таква авантура да е резервирана само за научниците, кога во тоа може да ужива и просечен човек. Доволно е само да ги сакате овие временски услови. А, да и треба да имате длабок џеб!